ОХУ-ын Батлан хамгаалахын сайд Сергей Шойгу Украинд явуулж буй “Цэргийн тусгай ажиллагаа”-ны командлагчаар ЗХЖШ-ын дарга армийн генерал Валерий Герасимовыг нэгдүгээр сарын 11-ний өдөр томиллоо.
Түүний орлогчоор Агаар, сансрын цэргийн командлагч армийн генерал Сергей Суровикин (2022 оны 10 дугаар сард “Цэргийн тусгай ажиллагаа”-ны командлагчаар томилогдсон), ЗХЖШ-ын орлогч дарга хурандаа генерал Алексей Ким, Хуурай замын цэргийн ерөнхий командлагч армийн генерал Олег Салюков нарыг томилсон байна.
ОХУ-ын БХЯ энэхүү томилгоог цэргийн ажиллагааны цар хүрээг өргөжүүлэх, төрөл мэргэжлийн цэрэг, цэргийн нэгтгэл ангиудын харилцан ажиллагааг сайжруулах зорилготой хэмээн мэдэгдэж байна.
