Үндэсний аюулгүй байдлын бодлого, улс орны хөгжлийн стратегийн шинжлэх ухааны үндэслэлийг боловсруулахад бодитой дэмжлэг үзүүлэх, Монгол Улсад стратегийн судалгааг хөгжүүлэх эрхэм зорилттой ҮАБЗ-ийн Стратегийн судалгааны хүрээлэнгийн цахим хуудаст зочилж буй Танд энэ өдрийн мэндийг дэвшүүлье.

          Монгол Улсад орчин үеийн аюулгүй байдлын судалгаа үүсч хөгжих тулгын чулууг анх тавьсан Стратеги судалгааны хүрээлэн өдгөө 30 жилийн ойгоо тэмдэглэж байгаа билээ. Үндэсний аюулгүй байдлыг хангах асуудлыг зөвхөн цэрэг, батлан хамгаалахын хүрээнд тодорхойлдог уламжлалт хандлагаас татгалзаж, улс төр дипломатын өргөн хүрээтэй арга хэрэгсэлд тулгуурласан аюулгүй байдлын цогц үзэл баримтлал, бодлогыг боловсруулж хэрэгжүүлэх, энэ чиглэлд олон улсын харилцаа хамтын ажиллагааг хөгжүүлж, харилцан итгэлцлийг бэхжүүлэхэд манай хүрээлэн бодитой үүрэг гүйцэтгэсээр ирсэн түүхэн замналтай.

          Монгол Улсын аюулгүй байдлын гадаад орчин эрс хувьсан, их гүрнүүдийн геостратегийн сөргөлдөөн ширүүсч, дэлхийн дэг журам өөрчлөгдөж байгаа өнөө үед мэдээлэл, судалгаа, дүн шинжилгээний байгууллагуудын үүрэг улам бүр нэмэгдэж байна. Ийм шинэ нөхцөлд судалгаа шинжилгээний ажлаа чанаржуулж, төрийн холбогдох байгууллагуудыг цаг үеэ олсон, практик ач холбогдол бүхий мэдээлэл, судалгаа, дүгнэлт, зөвлөмжөөр хангах нь манай хүрээлэнгийн эрхэм зорилго бас үүрэг юм.

          Эдүгээ судлаач биднээс нөр их хөдөлмөр, хүчин чармайлт, ур ухаан, мэдлэг чадвараа шавхаж ажиллах, үйл явдлын өрнөл, хэтийн төлөвийг бодитой тодорхойлсон дорвитой суурь судалгаа хийх шаардлага тулгараад байна.          

          Эрхэм уншигч та бүхний сонирхолд нийцэж, эрэлт хэрэгцээг хангахуйц мэдээллээр цахим хуудсаа тогтмол баяжуулж, эргэх холбоотой ажиллахыг бид зорьж байгаа болно.

ЗАХИРАЛ Б.ДАВААДОРЖ